მიხეილ სააკაშვილის ადვოკატი დიმიტრი საძაგლიშვილი მასთან კვლავ დახურული კომუნიკაციის შეხვედრას ითხოვს, ის დახმარებას საქართველოს ადვოკატთა ასოციაციასა და სახალხო დამცველს სთხოვს.
როგორც ადვოკატი ამბობს, დღემდე უკანონოდ არ უშვებენ მიხეილ სააკაშვილთან მის მკურნალ ექიმს, ეს იმ პირობებში, როდესაც მას აქვს ჯანმრთელობასთან დაკავშირებული პრობლემები, რაც არის მნიშვნელოვანი და არსებითი დარღვევა სააკშვილის ფუნდამენტური უფლებების. მისივე თქმით, ადვოკატებს არ აძლევენ პერსონალურად დახურული ფორმის კომუნიკაციის საშუალებას, რაზეც არაერთხელ მოითხოვეს, რომ ეს შეზღუდვები მოხსნილიყო, თუმცა დღემდე რუსთავის მე-12 პენიტენციური დაწესებულება და დირექტორი არაფერს აკეთებს, რომ ეს ბარიერი, რაც არსებობს, გაუქმებულიყო.
“საჯაროდ კიდევ ერთხელ მოვითხოვთ, რომ მოგვეცეს შესაძლებლობა კანონით დადგენილი წესით სააკაშვილთან კომუნიკაციის და ამ პროცესში დახმარებას ვთხოვთ საქართველოს ადვოკატთა ასოციაციას, სახალხო დამცველს და ნებისმიერ დაწესებულებას, ვისაც აქვს შესაძლებლობა, რომ რაიმე გავლენა მოახდინოს ამ დაცვის უფლების რეალიზებაზე”, – განაცხადა საძაგლიშვილმა.
ამასთანავე ადვოკატის თქმით, მიხეილ სააკაშვილის ჯანმრთელობის მდგომარეობასთან დაკავშირებით არანაირ ინფორმაციაზე წვდომა არ აქვთ, თუ ვინ ზრუნავს და რა ნაბიჯები იდგმება ამ მიმართულებით.
