ადიგენის მუნიციპალიტეტში, სოფელ არალისა და წარბასთუმნის მიმდებარედ, საქართველოს ეროვნული მუზეუმის არქეოლოგიურმა ექსპედიციამ მნიშვნელოვანი აღმოჩენა გააკეთა.
ზღვის დონიდან 1 560 მეტრზე, „ირმის რქაზე“, არქეოლოგიური გათხრების შედეგად აღმოჩნდა მრავალფენიანი ნამოსახლარი, სადაც ცხოვრების უადრესი ეტაპი წარმოდგენილია ადრე ბრინჯაოს ხანის მტკვარ-არაქსის კულტურით. კვლევის შედეგად გამოვლინდა ამ პერიოდის საცხოვრებელი ნაგებობების ნაშთები, სამეურნეო ორმოები და არქეოლოგიური მასალა: სადგრის ფრაგმენტები, თიხის ჭურჭელი, ხელსაფქვავები, თიხის მცირე ზომის ფიგურები, ობსიდიანის, კაჟისა და ქალცედონისაგან დამზადებული ნამგლის ჩასართები და ისრის პირები.
„განსაკუთრებით მნიშვნელოვანია ნამოსახლარზე ძვ.წ. III ათასწლეულის მიწურულით დათარიღებული ე.წ. ბედენური კულტურის ნამოსახლარის აღმოჩენა, რაც ამ კულტურის დადასტურების პირველი შემთხვევაა სამცხის ამ ნაწილში“,- აცხადებენ ეროვნულ მუზეუმში.
