დაავადებათა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, საქართველოში კორონავირუსით გარდაცვლილი მე-16 პაციენტის, 72 წლის კაცის ოჯახის წევრებიც ინფიცრებული არიან. ისინი ლილოსა და დინამოს მიმდებარე ბაზრობებზე მუშაობდნენ, შესაბამისად კონტაქტების წრე საკმაოდ ფართოა. „ამ პაციენტს ჰქონდა თირკმელების მძიმე, ქრონიკული დაავადება. ის იყო დიალიზზე. მასთან სწრაფად განვითარდა ინფექცია. სამწუხაროდ, ასევე, ინფიცირებული არიან მისი ოჯახის წევრებიც, თუმცა, მათთან კლინიკური მდგომარეობა დამაკმაყოფილებელია. ისინი მუშაობდნენ და ვაჭრობდნენ რამდენიმე ბაზრობაზე“, – განაცხადა ამირან გამყრელიძემ. ეპიდემიოლოგები, ამ დროისთვის ცდილობენ ზუსტად გაარკვიონ, რამდენ ადამიანთან ჰქონდათ მათ შეხება. ამ კლასტერში ინფიცირების წყარო უცნობია, რაც მდგომარეობას კიდევ უფრო ართულებს.
საკოორდინაციო საბჭოს გადაწყვეტილებით, ბაზრებსა და ბაზრობებზე კონტროლი მკაცრდება.
