გიგი უგულავამ თბილისის საქალაქო სასამართლოში აეროპორტის ინციდენტზე მიმდინარე პროცესის დასრულების შემდეგ განაცხადა, რომ ეს არის ჩვეულებრივი პოლიტიკური საქმე და რამდენჯერაც არ უნდა გაბრაზდეს მოსამართლე კოჭლამაზაშვილი, ყოველთვის მოახსენებს, რომ მონაწილეობს პოლიტიკურ ტაკიმასხარაობაში.
მისი თქმით, მიუხედავად იმისა, რომ ამ საქმეზე 8 თვეა პროცესები არ ყოფილა, 5 პროცესი ჩაინიშნა მიყოლებით. სავარაუდოდ, თებერვლის ბოლოს გამოიტანს მოსამართლე გადაწყვეტილებას. მოსამართლემ პროკურატურას „გაუპრავა“ და მისცა უფლება, რომ საქმეზე კამერების ჩანაწერები თანდართული არ არის. უგულავას თქმით, მოსამართლეს თვითონ შეეძლო ენახა რა არის ამ ჩანაწერებში და ამ საქმეს ნათელი მოეფინებოდა.
“მოწმეები იწყებენ თხრობას იმ მომენტიდან, როდესაც მე ვიქნევ ხელს, მაგრამ ჩემს სახეზე დაზიანებას ვერ ხედავდნენ, სამაგიეროდ აღმოაჩინეს უამრავი დაზიანება ბადრი გავაშელიშვილის სახეზე. აბსურდია ეს საქმე, ამის დასაწყისი არის 20 ივნისი, როდესაც საჯაროდ ბიძინა ივანიშვილს მოვუკითხე ახლობლები იმიტომ, რომ ჩაიდინა დანაშაული, მარაზმი და საშინელება. ერთადერთი რაც შეიძლებოდა ნორმალურ ადამიანს იმ მომენტში ექნა, იყო შეგინება, ეს ადამიანი დღესაც იმსახურებს გინებას, შეუძლებელია სხვა რამე ნორმალურ ადამიანს ეთქვა. ეს არის ჩვეულებრივი პოლიტიკური საქმე და სამართალთან არაფერი საქმე არ აქვს, რამდენჯერაც არ უნდა გაბრაზდეს მოსამართლე კოჭლამაზაშვილი, ყოველთვის მოვახსენებ, რომ მონაწილეობს პოლიტიკურ ტაკიმასხარაობაში. ვერ ვიტყვი რითი დამთავრდება ეს საქმე, მაგრამ როგორც არ უნდა დამთავრდეს, არის აბსურდული და აჩვენებს, რომ ჩვეულებრივი მოძალადეა ხელისუფლება”,- განაცხადა უგულავამ.
შეგახსენებთ, რომ თბილისის საქალაქო სასამართლოში ოპოზიციონერი ლიდერის, გიგი უგულავას ბრალდების სისხლის სამართლის საქმეზე სასამართლო პროცესი გაიმართა. დღევანდელ პროცესზე ბრალდების მხარის 4 მოწმე დაიკითხა, მათ შორის არიან, მესაზღვრე პატრული და გამომძიებელი.
შემთხვევა თბილისის აეროპორტში 2019 წლის 11 დეკემბერს მოხდა. გიგი უგულავას ბრალი სისხლის სამართლის კოდექსის 126-ე მუხლით აქვს წარდგენილი, რაც ძალადობას გულისხმობს. მას ძიუდოისტ ბადრი გავაშელიშვილის ცემას ედავებიან. გიგი უგულავასთან ერთად ბრალდებულია გავაშელიშვილის მეგობარი დავით პარკაძე, რომელსაც პოლიტიკოს გოკა გაბაშვილის ცემას ედავებიან.
