“სტრატეგია აღმაშენებლის” თავმჯდომარემ გიორგი ვაშაძემ განათლებისა და მეცნიერების კომიტეტის სხდომაზე უმაღლესი განათლების შესახებ კანონში ცვლილებებთან დაკავშირებით კანონპროექტი წარმოადგინა.
კანონპროექტი ითვალისწინებს რექტორების არჩევის წესის ცვლილებას, რომლის მიხედვითაც რექტორებს აირჩევენ პროფესორ-მასწავლებლები 4 წლიანი ვადით, პირდაპირი ფარული კენჭისყრით.
„წარმოგიდგენთ კანონპროექტს უმაღლესი განათლების შესახებ კანონში ცვლილებებთან დაკავშირებით, რომელიც ითვალისწინებს სახელმწიფო უმაღლესი სასწავლებლების რექტორების პირდაპირი არჩევის წესს. დღეს რექტორები აირჩევა სამეცნიერო საბჭოს მიერ, ჩვენ კი გთავაზობთ მათი არჩევა მოხდეს პროფესორ-მასწავლებლების მიერ, პირდაპირი ფარული კენჭისყრით, 4 წლიანი ვადით ისევე, როგორც ხდება ჩვეულებრივი არჩევნების დროს. ასევე მინდა ვთქვა, რომ ეს ინიციატივა წამოვიდა მაშინ, როდესაც სტუდენტები შიმშილობდნენ და ითხოვდნენ ტექნიკური უნივერსიტეტის რექტორის გადადგომას. ჩვენ მათ შევთავაზეთ მარტივი პროცედურა, რომ აღარ იყოს მუდმივად დავა სამართლიანად თუ უსამართლოდ არის დანიშნული ეს კონკრეტული ადამიანი უნივერსიტეტის რექტორად, ამის შედეგად სტუდენტები დაგვეთანხმნენ და შეწყვიტეს კიდეც შიმშილობა”, – განაცხადა გიორგი ვაშაძემ.
„სტრატეგია აღმაშენებლის“ პრესსამსახურის ინფორმაციით, აღნიშნული კანონპროექტი განათლების და მეცნიერების კომიტეტმა არ გაიზიარა.
