პოლიტიკური ჯგუფი “გირჩი” მცენარე კანაფის და მარიხუანას უკანონო შეძენა- შენახვა, გადაზიდვა, გადაგზავნა, გასაღებაზე სისხლის სამართლის პასუხისმგებლობის გაუქმებას და კოდექსიდან შესაბამისი მუხლის ამოღებას ითხოვს. მათ პარლამენტს საკანონმდებლო ინიციატივა წარუდგინეს.
“გირჩის” ინფორმაციით, იუსტიციის სამინისტროსგან გამოითხოვეს ინფორმაცია იმის თაობაზე, თუ რამდენი ადამიანი იხდის სასჯელს მარიხუნასა და მისი პროდუქტების ფლობასთან ან მოხმარებასთან დაკავშირებით: 311 ადამიანი არის პრობაციონერი, ხოლო 84 ადამიანი სასჯელს იხდის კანაფის და მისი პროდუქტების ფლობაზე, ქონაზე ან მოხმარებაზე. კანაფის მოყვანა-კულტივირებაზე ციხეში 33 ადამიანი ზის, კანაფის შეძენა-შენახვაზე – 32 ადამიანი, ფლობაზე – 7 ადამიანი, კანაფის ფისზე- 2 ადამიანი, 4 ადამიანი გასაღებაზე და 6 ადამიანი გადაზიდვაზე. იაგო ხვიჩიას თქმით, ეს მონაცემებია პროდუქტზე, რომელიც საკონსტიტუციო სასამართლოს მიერ ლეგალიზებულია.
“კანონპროექტით, სისხლის სამართლის სფეროდან საერთოდ ამოდის მცენარე მარიხუანასთან და კანაფთან დაკავშირებული ურთიერთობები. ეს ადმინისტრაციულ სამართალდარღვევის საკითხი იქნება. კანონპროექტით, ეს ქმედება ისევ რჩება სამართლით დაცულ სფეროში, მაგრამ პროექტის მიღების შემთხვევაში, კანაფის გამო არც ახლა იჯდება ვინმე ციხეში და არც შემდეგ. გვინდა, პირველი ნაბიჯი გადავდგათ და შევუთანხმდეთ ერთმანეთს იმაში, რომ კანაფის და მისი პროდუქტების გამო ერთმანეთს არ ვიჭერთ. ის, თუ როგორ უნდა დარეგულირდეს ადმინისტრაციულ სფეროში, ამაზე ერთად მსჯელობა შეგვიძლია, მმართველ პარტიას და ოპოზიციას”,- განაცხადა იაგო ხვიჩიამ.
