ოკუპირებული ცხინვალის დე-ფაქტო რეჟიმის უკანონო პატიმრობიდან გათავისუფლებული გენადი ბესტაევი მართვით სუნთქვაზე, კომატოზურ მდგომარეობაში იმყოფება.
პაციენტი გვიან ღამით, ცხინვალიდან თბილისში ქართულ-ჰოლანდიურ ჰოსპიტალში გადმოიყვანეს.
კლინიკის ექიმ-რეანიმატოლოგის ინფორმაციით, ამ ეტაპზე მისი ჯანმრთელობის შესახებ პროგნოზის გაკეთება შეუძლებელია.
ოკუპირებული სამხრეთ ოსეთის ე.წ. პრეზიდენტმა ანატოლი ბიბილოვმა საქართველოს 53 წლის მოქალაქის გენადი ბესტაევის შეწყალების შესახებ განკარგულებას ხელი გუშინ მოაწერა. ბესტაევი 2019 წლის ნოემბერში ე.წ. რესპუბლიკის ,,სახელმწიფო საზღვრის” უკანონო გადაკვეთისა და ნარკოტიკების კონტრაბანდის ბრალდებით დააკავეს და შემდეგ სამი წლითა და ორი თვით თავისუფლების აღკვეთა მიუსაჯეს. შეწყალების გადაწყვეტილება მისი ავადმყოფობის გამო იქნა მიღებული.
