გალში მცხოვრები საქართველოს მოქალაქე ნიკა ბებუა ოკუპირებული აფხაზეთის დე-ფაქტო რესპუბლიკის დროშის დაწვის გამო დააკავეს. მისი თქმით, ქართველებისა და აფხაზების დაყოფის თარიღი არ უნდა აღინიშნებოდეს.
„არაფერი მაქვს საწინააღმდეგო აფხაზების მიმართ, ჩვენ ძმები ვართ და ადრინდელივით კარგად უნდა ვიყოთ. ბოდიშს ვუხდი ყველას ვინც განაწყენებულია“, – ამბობს ბებუა.
ქართველი ბლოგერის გიორგი ჯახაიას განცხადებით, ოკუპირებული რეგიონის დე ფაქტო ხელისუფლება გალის რაიონში მცხოვრებ მოსახლოებას აიძულებს აფხაზეთის „გამარჯვების დღე“ აღნიშნოს.
„ყველაზე ამაზრზენი ის არის, რომ ქართველ ბავშვებსაც კი აიძულებენ წაიკითხონ ლექსები, სადაც ქართველებს ფაშისტებს, ბანდიტებს და კრიმინალებს უწოდებენ“, – წერს ბლოგერი.
ირაკლი (ნიკა) ბებუას.უკანონო დაკავების ფაქტთან დაკავშირებით, საქართველოს სახელმწიფო უსაფრთხოების სამსახურმა, მოახდინა ჟენევის დისკუსიების თანათავმჯდომარეებისა და საერთაშორისო პარტნიორების ინფორმირება. მიმდინარეობს აქტიური მუშაობა პირის დაუყოვნებლივ გათავისუფლების მიზნით.
