მიხეილ სააკაშვილის ჯანმრთელობის მონიტორინგის მიზნით შექმნილი სახელმწიფო კონსილიუმის წევრი ექიმი ენდოკრინოლოგი ელენე გიორგაძე ითხოვს, რომ სამ ვიზიტორზე მეტი დღეში არ იყოს და ვინ შევა ყოფილ პრეზიდენტთან, ეს უკვე ექიმის გადასაწყვეტი არ არის.
ექიმის თქმით, სააკაშვილის ანალიზები ნელ-ნელა სწორდება, იმდენად რომ გარკვეული პრეპარატი მოეხსნა.
„დღეს ჩემი პაციენტი მე დამხვდა გაბრაზებული და აფორიაქებული, მაგრამ მე არ ვიცი რატომ. პაციენტს, რომელსაც ანერვიულებენ არ ვიცი ტელევიზორით თუ რით, ეს ჩემი პრობლემა არ არის. ბუნებრივია, როგორც ექიმი, ამაზე ვბრაზდები. მე ყველას ვთხოვე – მის იურისტებს, ამხანაგებსაც, ოჯახის წევრებსაც, რომ ორი კვირა დამაცადონ, რომ ეს ადამიანი დავაყენო ფეხზე. თუ ამ ადამიანზე მართლა ზრუნავთ და ზრუნავთ მის სიცოცხლეზე, ცოტა დრო, ორი კვირა მოგვეცით ექიმებს, რომ გამოვიყვანოთ ბოლომდე ამ მდგომარეობიდან. თვითონ პაციენტი არაჩვეულებრივად მოგვყვება ექიმებს. ჩვენც ვთხოვეთ, რომ სამ ვიზიტორზე მეტი დღეში არ იყოს და რომელი ვიზიტორი იქნება და ვინ შევა მასთან, ეს უკვე ექიმის გადასაწყვეტი არ არის. როდესაც რომელიმე ვიზიტორი შედის და მასთან ხანგრძლივად რჩება, მერე, ადამიანი, რომელიც შიმშილიდან გამოდის და ახლა იწყებს ადეკვატურ და ნორმალურ კვებას, იღლება, რამე არის გასაკვირი ამაში?! “ – განაცხადა ელენე გიორგაძემ.
