ვანო ჩხარტიშვილმა ტელეკომპანია „მზის“ დათმობის მიზეზებზე 10 ივლისის „ღამის კურიერში“ ირაკლი იმნაიშვილთან ისაუბრა.
„მაშინ პირდაპირი მნიშვნელობით იძალადა ჩემზე საქართველოს პრეზიდენტმა, მაიძულა ამ ტელევიზიის დათმობა. ერთ ლარად გადავეცი ეს ტელევიზია დავით ბეჟუაშვილს, გადავეცი ცემენტის ქარხანას, ასე ვთქვათ და მე ვერ შევძელი იმ პერიოდში ამ ტელევიზიის დაცვა და შესაბამისად მოვახდინეთ აბსოლუტურად ნებაყოფლობით ჩემი მხრიდან, მაგრამ მისი მხრიდან ძალადობრივი გზით. მე ორჯერ შემხვდა ამ საკითხთან დაკავშირებით სააკაშვილი, მერე გაგრძელა უგულავამ, უგულავა იყო ადმინისტრაციის უფროსი. მან მითხრა, რომ ეს ტელევიზია ჩვენ გვინდა, აქ უნდა გავიდეს „მულტიკები“, სარედაქციო პოლიტიკა ჩვენი უნდა იყოს და ამიტომ მიეცით საშუალება ბეჟუაშვილს, რომ მართოს ტელევიზია,-‘’ აღნიშნა ვანო ჩხარტიშვილმა.
მისი განცხადებით, „სააკაშვილს მარტო ერთი რამ აწუხებდა, ამბობდა, რომ მე არ მინდა საქართველოში იყოს ამდენი თოქ-შოუ, მე მინდა, რომ აქ იყოს აბსოლუტურად სხვა ფორმატი, სარედაქციო პოლიტიკა თქვენი არის და ხელს გვიშლის ჩვენ ჩვენი მიზნების განხორციელებაში. ამიტომ დახურეთ გრიგოლიას შოუ, დახურეთ თქვენი თოქ-შოუ და მინდა, რომ გადაეცეს ეს ტელევიზია ბეჟუაშვილს და მინდა, რომ ეს გააკეთოთ ძალიან სწრაფად. მე ვუთხარი, რომ ეს ცოცხალი ორგანიზმია, რომ ასე სწრაფად არ შეიძლება ამის გაკეთება. გამოვდივართ მისი კაბინეტიდან და მხვდება ბეჟუაშვილი და მეუბნება, რომ ღამით იქნებ წახვიდეთ და გადააფორმოთ ახლა ეს ტელევიზია. ღამით ეს არ შედგა, მაგრამ დაახლოებით 1 კვირაში ჩვენ გადავაფორმეთ“.
ვანო ჩხარტიშვილმა აღნიშა, რომ „ახლაც სინანულს გამოვხატავ მაგ პერიოდის მიმართ, მაგრამ ვერ შევძელი იმიტომ, რომ გარემო იყო ძალიან მძიმე და მოკავშირეები, ამასთან დაკავშირებით, ძალიან მცირე ადამიანები იყვნენ ჩვენს გვერდით და იმ პერიოდში იძულებული გავხდი, რომ ეს ნაბიჯი გადამედგა“ ამასთან მისი აზრით: „ბუნებრივია ადამიანი, რომელსაც ბიზნესი აქვს ქვეყანაში და პრეზიდენტი იყოს მტერი არავის არ უნდა. ბუნებრივია მინდოდა მეცხოვრა ნორმალურ ქვეყანაში, სიმშვიდე მინდოდა, მინდოდა, რომ ბიზნესი განვითარებულიყო, მაგრამ ვერ შევძელი. მე არ წავედი ხელისუფლებასთან გარიგებაში არც ერთ დროს, არც ერთ ეტაპზე და ამის მიუხედავად, რომ 2010 წელს დავტოვე საქართველო. ვერც ერთი დანაშაული და ფაქტი, ბიუჯეტის დავალიანება, თუ სახელმწიფოსთან ურთიერთობის საკითხი სააკაშვილმა ვერ აღმოაჩინა, რადგან მას გადაწყვეტილი ჰქონდა, რომ გადაეცა ინტერპოლში ჩემზე საბუთები, მაგრამ ვერ იპოვა ვერაფერი და ის 2 წელი, რაც სააკაშვილი ხელისფულებაშ იყო 24 საათი მუშაობდა მაგაზე, რომ იქნებ რაიმე კანონდარღვევა ეპოვა ჩემზე,-განაცხადა ვანო ჩხარტიშვილმა.
ბიზნესმენის განცხადებით, იგი დღესაც აგრძელებს ტელეკომპანია „მზის“ დასაბრუნებლად ბრძოლას: „დღესაც ვბრძოლობთ მაგ ტელევიზიის დაბრუნებისთვის, ჩვენ დავწერეთ პროკურატურაში წერილი, სასამართლოში ლონდონის გადაწყვეტილებაც მივიტანეთ, მაგრამ სამწუხაროდ ეს აქტივი დღეს ჰაერშია გამოკიდებული და არ არის თავის მეპატრონესთან. ბრიტანეთიდან ჩამოსვლის შემდეგ დაახლოებით 1 კვირაში პროკურატურაში ძალიან ვრცელი ჩვენება მივეცი ყველა ფაქტთან დაკავშირებით და სამწუხაროდ არ მიეცა მას წინსვლა,“-აღნიშნა ვანო ჩხარტიშვილმა “ღამის კურიერში”.
