რუსეთის პრეზიდენტის ვლადიმირ პუტინის მიერ უკრაინის ორი რეგიონის, ლუგანსკისა და დონეცკის „დამოუკიდებლად“ ცნობას მსოფლიო ლიდერების მხრიდან მკაცრი რეაქცია და სანქციების დაწესების შესახებ განცხადებები მოჰყვა.
ვგმობ რუსეთის მიერ უკრაინაში დონეცკისა და ლუგანსკის აღიარებას, – განაცხადა ნატოს გენერალურმა მდივანმა, იენს სტოლტენბერგმა.
გაეროს გენერალურ მდივანი, ანტონიო გუტერეში მიიჩნევს, რომ ორი სეპარატისტული რეგიონის აღიარებით რუსეთმა უკრაინის ტერიტორიული მთლიანობა და სუვერენიტეტი დაარღვია.
რუსეთის მიერ დონეცკისა და ლუგანსკის აღიარება კიდევ ერთი ნაბიჯია, რომელიც მიმართულია საერთაშორისო სამართლის ფუნდამენტური პრინციპების წინააღმდეგ და სამწუხაროდ, 2008 წელს საქართველოს ტერიტორიების ოკუპაციას იმეორებს, – განაცხადა საქართველოს პრემიერ-მინისტრმა, ირაკლი ღარიბაშვილმა.
„ჩვენ მტკიცედ ვუჭერთ მხარს უკრაინის სუვერენიტეტსა და ტერიტორიულ მთლიანობას“, – აღნიშნა საქართველოს პრემიერ-მინისტრმა.
საქართველო მტკიცედ გმობს რუსეთის მიერ უკრაინის დონეცკისა და ლუგანსკის რეგიონების „აღიარებას“, რაც იმეორებს იმ სცენარს, რამაც ჩვენი ტერიტორიის 20%-ის ოკუპაცია გამოიწვია, – განაცხადა საქართველოს პრეზიდენტმა, სალომე ზურაბიშვილმა.
