შერიგებისა და სამოქალაქო თანასწორობის საკითხებში საქართველოს სახელმწიფო მინისტრის თეა ახვლედიანის განცხადებით, საქართველოს ხელისუფლების განსაკუთრებული ზრუნვის საგანს წარმოადგენს აფხაზური ენის შენარჩუნება და პოპულარიზაცია.
ჩართულობის პოლიტიკისა და სამოქმედო გეგმის სტრატეგიული გადახედვის მიზნით მოწვეულ სამთავრობო უწყებათაშორისი კომისიის სხდომაზე მან განაცხადა, რომ 27 ოქტომბერს აფხაზური ენის დღე აღინიშნება.
“დღესდღეობით, როდესაც აფხაზეთის ოკუპაციის და მიმდინარე რუსიფიკაციის პირობებში აფხაზურ ენას გაქრობის სერიოზული საფრთხე ემუქრება, განსაკუთრებით აქტუალურია აფხაზური ენის დაცვის საჭიროების ხაზგასმა და მისი განვითარებისთვის ქმედითი ნაბიჯების განხორციელება. საქართველოს ხელისუფლების განსაკუთრებული ზრუნვის საგანს წარმოადგენს აფხაზური ენის შენარჩუნება და პოპულარიზაცია, მათ შორის, აფხაზური ენის სწავლების ხელშეწყობის, შესაბამისი სახელმძღვანელოების მომზადების, ისევე როგორც აფხაზური ენისა და კულტურის კვლევისა და შემდგომი განვითარების გზით, რაც მეტად მნიშვნელოვანია კიდევ უფრო გაძლიერდეს აფხაზურ საზოგადოებასთან ჩვენი ერთობლივი ძალისხმევით”,- განაცხადა სახელმწიფო მინისტრმა თეა ახვლედიანმა.
