უკრაინული მედიის ცნობით, კიევში, გენერალური პროკურორის მრჩეველს, საქართველოს იუსტიციის ყოფილ მინისტრს ზურაბ ადეიშვილს უცნობი პირები თავს დაესხნენ და სცემეს.
მათი ინფორმაციით, მომხდარი საქართველოში ადეიშვილის საქმიანობას უკავშირდება. მათივე თქმით, მისი ჯანმრთელობის მდგომარეობა დამაკმაყოფილებელია და საავადმყოფოში ექიმების მეთვალყურეობის ქვეშ იმყოფება.
კიევის პოლიციაში განაცხადეს, რომ მიმდინარეობს გენერალური პროკურორის მრჩეველზე თავდასხმის გარემოებების დადგენა.
„7 თებერვალს კიევის პოლიციაში ექიმების მხრიდან შევიდა ინფორმაცია, რომ ტვერსკის ქუჩაზე არსებულ სამედიცინო დაწესებულებაში ჰოსპიტალიზებულია მამაკაცი, რომელიც უცნობმა პირებმა სცემეს. მისამართზე გავიდა საგამოძიებო-ოპერატიული ჯგუფი. წინასწარ დადგენილია, რომ დაზარალებულს ქუჩაში მიუახლოვდა ოთხი უცნობი პირი, სცემა და ადგილიდან მიიმალა. 49 წლის პირი ჰოსპიტალიზებულია“, – აღნიშნულია გამოცემის ინფორმაციაში.
