კიევში ოფიციალური ვიზიტით მყოფმა პარტია „ლელოს“ წევრებმა დღეს რადაში შეხვედრები გამართეს. პროტოკოლით გათვალისწინებული ოფიციალური ნაწილის დაწყებამდე, „ლელოს“ ლიდერებმა სიმბოლურად უმაღლეს საკანონმდებლო ორგანოში საქართველოს დროშა გაშალეს.
„ლელოს“ ლიდერის, გრიგოლ გეგელიას თქმით, ქართველების ხმა ახლა კიევში მკაფიოდ ისმის.
„ყველა ქართველის სახელით ხელისუფლების სამარცხვინო ქცევა გამოვასწორეთ.
ჩვენ რადაში საქართველოს დროშა აღვმართეთ. მე ძალიან ბედნიერი ვარ, რომ იმ სამარცხვინო და ტრაგიკული პროცესების შემდეგ, რომელიც ჩვენ გავიარეთ ქართულ პოლიტიკაში, დღეს რადაში პირველად გაიშალა ქართული დროშა, იქ სადაც მისი ადგილია.
ჩვენ, სამწუხაროდ, ვნახეთ, რომ როდესაც რამდენიმე დღის წინ, რადას დეპუტატებმა გაშალეს სხვადასხვა მხარდამჭერი ქვეყნის დროშა, იქ არ იყო ჩვენი ქვეყნის სიმბოლიკა. ჩვენ გავშალეთ ქართული დროშა იქ, სადაც მისი ადგილია და სადაც უნდა ყოფილიყო ჩვენი მეგობრების გვერდით. ქართველების ხმა ახლა კიევში მკაფიოდ ისმის”, – აცხადებს გრიგოლ გეგელია.
“ლელოს” დელეგაცია უკრაინაში გუშინ საღამოს ჩავიდა. ვიზიტის ფარგლებში მამუკა ხაზარაძემ, სალომე სამადაშვილმა და გრიგოლ გეგელიამ უკრაინის საკანონმდებლო ორგანოში ოფიციალური შეხვედრები გამართეს.
