,,ნაციონალური მოძრაობის“ მხარდამჭერები და სამოქალაქო აქტივისტები ,,ქართული ოცნების” ოფისთან საპროტესტო აქციას მართავენ. ისინი ქვეყანაში არსებულ სოციალურ და ეკონომიკურ მდგომარეობას აპროტესტებენ.
აქციის მონაწილეებმა ოფისთან ბანერები მიიტანეს წარწერით „მატყუარა მთავრობა”, ,,ოცნება გვაღარიბებს”, ,,ხელისუფლება დაგვცინის” და სხვა. მსგავსი საპროტესტო აქციები ქობულეთში, ფოთსა და ქუთაისში გაიმართება.
,,ნაციონალური მოძრაობის” წევრის ირაკლი ნადირაძის განცხადებით, ისინი მივიდნენ კორუფციის ბუდესთან, იმიტომ რომ ,,ქართული ოცნების” ოფისს სხვა სახელს ვერ უწოდებენ. მისი თქმით, ხელისუფლება იმის ნაცვლად, რომ ყოველდღიურად ზრუნავდეს მოქალაქეების კეთილდღეობაზე, მოშიმშილე ბავშვებზე, სოციალურად დაუცველებზე ან პენსიონერებზე, დაკავებულია მხოლოდ იმით როგორ გაინაწილონ ხალხის ფული და გაუძვირონ მოსახლეობას ცხოვრება.
“ქვეყანაში გაძვირებულია პროდუქტები, მედიკამენტები, კომუნალური გადასახადები და შიმშილი, რა პირობებშიც მოსახლეობას უწევს ცხოვრება. ვიბრძოლებთ მანამ, სანამ ეს დანაშაულებრივი რეჟიმი არ მოშორდება ამ ქვეყანას. აქციები იქნება ყოველდღიური, თუ ვინმეს აქვს მოლოდინი რომ ქვეყანაში პროტესტი ან აქციები არ იქნება, ძალიან ცდება. ყოველდღიურად იქნება აქციები და გაზაფხულის მოსვლასთან ერთად საპროტესტო ტალღა იქნება უფრო ძლიერი”, – აღნიშნა ირაკლი ნადირაძემ.
