საქართველოს ევროკავშირში გაწევრიანების ოფიციალური განაცხადი 2022 წლის 3 მარტს, ბელგიის სამეფოსა და ლუქსემბურგის დიდ საჰერცოგოში საქართველოს ელჩმა, ევროკავშირთან საქართველოს მისიის ხელმძღვანელმა, ვახტანგ მახარობლიშვილმა, ევროკავშირის საბჭოს თავმჯდომარე ქვეყნის, საფრანგეთის მუდმივ წარმომადგენელს ევროკავშირში, ფილიპ ლეგლიზ კოსტას გადასცა, – ამის შესახებ ინფორმაციას საგარეო საქმეთა სამინისტრო ავრცელებს.
მათივე ინფორმაციით, საქართველოს პრემიერ-მინისტრის ხელმოწერით ოფიციალური განაცხადის გადაცემით ევროკავშირის საბჭოს ეთხოვა დაიწყოს შესაბამისი პროცედურები საქართველოს ევროკავშირში გასაწევრიანებლად.
,, ჩვენთვის ისტორიული დღეა და ემოციებით არის დატვირთული. დღეს საქართველომ შეიტანა ოფიციალური განაცხადი ევროკავშირში წევრობაზე. ჩვენ ბევრი წელია, ამ მიზნისთვის ვმუშაობთ. საქართველოს ევროკავშირში ინტეგრაციის პროცესი სრულიად ახალ ეტაპზე გადადის და რა თქმა უნდა, მინდა ჩემი მოკრძალებული მილოცვა გავუზიარო მთელ საქართველოს. მე მქონდა დიდი პატივი, გადამეცა საფრანგეთის ელჩისთვის, რომელიც ევროკავშირის თავმჯდომარე ქვეყანაა, განაცხადი წერილი და ამ აქტით განგვეხორციელებინა ჩვენი წარდგენა.
როდესაც კონსულტაციებს გავდიოდით ევროკავშირის წევრ ქვეყნებთან, მათი მხრიდან დაფიქსირებული იყო, რომ მოსალოდნელი იყო ჩვენ ანალოგიურ ნაბიჯს გადავდგამდით, რაც უკრაინამ გააკეთა წევრობაზე.
ვფიქრობ, ევროკავშირის გაბედული ნაბიჯები ძალიან მნიშვნელოვანი იქნება. ძალიან არაორდინარული პერიოდია და არაორდინარული გადაწყვეტილებები სავსებით შესაძლებელია,”- განაცხადა საქართველოს ელჩმა ევროკავშირში ვახტანგ მახარობლიშვილმა.