საქართველოს პრემიერ-მინისტრ ირაკლი ღარიბაშვილის განცხადებით, მედიკამენტების ფასები არის ძალიან გაზრდილი და ვალდებული არიან , ამაზე მოახდინონ დროული რეაგირება. ეკონომიკური საბჭოს სხდომაზე განიხილეს ფარმაცევტული ბაზრის მონიტორინგის შუალედური ანგარიში, რომელიც ღარიბაშვილს კონკურენციის სააგენტოს თავმჯდომარემ ირაკლი ლექვინაძემ წარუდგინა.
პრემიერ-მინისტრმა შესაბამისი უწყებების ხელმძღვანელებთან ერთად იმსჯელა იმ ნაბიჯებზე, რომლებიც, მედიკამენტების მაღალ ფასებთან დაკავშირებული გამოწვევის დროულად გადასაჭრელად, რაც შეიძლება მოკლე ვადებში უნდა გადაიდგას.
“უკვე წლებია, ასე განვითარდა ეს პროცესი და საჭიროებს სწორად ჩარევას ჩვენი მხრიდან. რეალურად, ჩვენ უნდა გავაკეთოთ ისე, როგორც არის ევროპის ქვეყნებში. ახალს არაფერს არ ვიგონებთ, ეს საკითხი უნდა დარეგულირდეს, იმიტომ, რომ ჩვენს მოსახლეობას ძალიან აწუხებს. მედიკამენტების ფასები არის ძალიან გაზრდილი და ჩვენ ვართ ვალდებული, ამაზე მოვახდინოთ რეაგირება, თანაც დროული. მინდა, ამ ფორმატში ვიმსჯელოთ და დავიწყოთ რეაგირება და ქმედება”,- განაცხადა პრემიერ-მინისტრმა.
