საქართველოს პრემიერ-მინისტრმა, ირაკლი ღარიბაშვილმა დავოსში, მსოფლიო ეკონომიკურ ფორუმზე განაცხადა, რომ ძალიან ერთგულები ვართ ევროკავშირის ღირებულებებისა და პრინციპების მიმართ, ხორციელდება დემოკრატიული რეფორმები, რაც გათვალისწინებულია „ასოცირების შეთანხმებით“.
მისი თქმით, მოსახლეობის 80 %-ზე მეტი მხარს უჭერს იდეას, რომ საქართველო უნდა გახდეს ევროპული ოჯახის წევრი და ახლა მთავრობას სჭირდება ხალხის მოლოდინების მართვა.
„მიგვაჩნია, რომ ძალიან ერთგულები ვართ ევროკავშირის ღირებულებებისა და პრინციპების მიმართ, ვახორციელებთ დემოკრატიულ რეფორმებს. ვაკეთებთ ყველაფერს, რაც გათვალისწინებულია „ასოცირების შეთანხმებით“. ჩვენ შევასრულეთ „ასოცირების შეთანხმების“ 45 %-ზე მეტი. ვახორციელებთ ძალიან ამბიციური რეფორმების დღის წესრიგს 2014 წლიდან. გვაქვს მნიშვნელოვანი გაუმჯობესება ყველა მიმართულებით, იქნება ეს კანონის უზენაესობა, სასამართლო რეფორმა, ღია მმართველობა. ჩვენ ყველა მიმართულებით უზარმაზარი, ხელშესახები პროგრესი გვაქვს და ხალხი ამას ხედავს,“ – აღნიშნა საქართველოს პრემიერმა.
