პარლამენტში პირველი მოსმენით განიხილეს კანონპროექტი, რომლის მიხედვითაც საბავშვო ბაღებსა და სკოლებში სახელმწიფო დროშების აღმართვა სავალდებულო ხდება.
კანონპროექტის მიხედვით, სავალდებულო იქნება სახელმწიფო დროშის მუდმივად აღმართვა და სახელმწიფო გერბის სრული სახით განთავსება ზოგადსაგანმანათლებლო დაწესებულების/სკოლის შენობებზე და საქართველოს კანონმდებლობის შესაბამისად დაფუძნებულ იმ იურიდიული პირის შენობებზე, რომელიც უზრუნველყოფს სკოლამდელი აღზრდისა და განათლების მომსახურების მიწოდებას. ასევე, კანონპროექტის საფუძველზე სავალდებულო გახდება საქართველოს სახელმწიფო ჰიმნის ტექსტის თვალსაჩინო ადგილას განთავსება ზემოაღნიშნულ დაწესებულებებში.
კანონპროექტის მომხსენებლის, „ქართული ოცნების“ წევრის კახა კახა კახიშვილის განცხადებით, ცვლილებების მიზანი საბავშვო ბაღის ასაკიდან პატრიოტიზმის გაღვივევების ხელშეწყობაა. კახიშვილის თქმით, ასევე განიხილავენ, რომ სახელმწიფო დროშების აღმართვა უმაღლესი სასწავლებლებისთვისაც სავალდებულო გახდეს
კენჭისყრა მოგვიანებით გაიმართება, თუმცა პარლამენტი მას დიდი ალბათობით მიიღებს, რადგან კანონპროექტს მმართველი პარტიის გარდა მხარს უჭერენ ოპოზიციაშიც. დავით კირკიტაძის განცხადებით, ინიციატივას მხარს დაუჭერს ენმ-ს ფრაქცია, მხარდმჭერი პოზიცია დააფიქსირეს “მოქალაქეებმაც’. კანონპროექტი გააკრიტიკეს “გირჩში”. ალექსანდრე რექვიაშვილის თქმით, ეს მიდგომა საბჭოთა კავშირს ახსენებს.
.
