“საერთაშორისო გამჭვირვალობა” – პარლამენტის 150 წევრიდან, ბიზნესთან კავშირი აქვს 62 დეპუტატს

„საერთაშორისო გამჭირვალობა-საქართველო“ ანგარიშს აქვეყნებს, რომლის თანახმად, პარლამენტის წევრების არადეკლარირებული ბიზნეს აქტივები და მათ სტატუსთან შეუთავსებელი მეათე მოწვევის პარლამენტში საქმიანობა პრობლემას წარმოადგენს.

კვლევაში აღნიშნულია, რომ საკითხით საჯარო სამსახურის ბიურო უნდა დაინტერესდეს და ინტერესთა შესაძლო შეუთავსებლობის საკითხი პარლამენტის საპროცედურო საკითხთა და წესების კომიტეტმა შეისწავლოს.

ოფიციალური მონაცემების შესწავლის საფუძველზე გამოიკვეთა პარლამენტის წევრების ბიზნეს ინტერესები: პარლამენტის 150 წევრიდან, ბიზნესთან კავშირი აქვს 62 დეპუტატს; 10 დეპუტატს წილის საკუთრება არასრულად აქვს მითითებული დეკლარაციაში.

ამ საკითხზე „საერთაშორისო გამჭირვალობა-საქართველო“ ხელისუფლებას რეკომენდაციებით მიმართავს:

„საქართველოს პარლამენტის საპროცედურო საკითხთა და წესების კომიტეტმა განახორციელოს აღნიშნულ შემთხვევებზე ზედამხედველობა, კანონით გათვალისწინებული უფლებამოსილების ფარგლებში შეისწავლოს კვლევაში მითითებული შემთხვევები და მოახდინოს რეაგირება;

საჯარო სამსახურის ბიურომ წარმოდგენილი ინფორმაციის საფუძველზე დაიწყოს კვლევაში აღნიშნული პირების ქონებრივი მდგომარეობის დეკლარაციების მონიტორინგი“,-აღნიშნულია განცხადებაში.