ჯანდაცვის სამინისტროსა და დაავადებათა კონტროლის ეროვნული ცენტრის ერთობლივი გადაწყვეტილებით საიზოლაციო პერიოდი გარკვეული პროფესიის ადამიანებისთვის ხუთ დღემდე შემცირდა.
იმ დაწესებულებათა ჩამონათვალი, რომლის თანამშრომლებიც კოვიდის დადასტურებიდან მეექვსე დღეს სწრაფი ტესტის უარყოფითი პასუხის შემთხვევაში საიზოლაციო პერიოდს დაასრულებენ არის: სამედიცინო სექტორი, ზოგადსაგანმანათლებლო დაწესებულებები, შინაგან საქმეთა, იუსტიციისა და თავდაცვის სამინისტროების სისტემები, სახელმწიფო უსაფრთხოების სამსახური, საქართველოს პროკურატურის სისტემა, ფინანსთა სამინისტროს შემოსავლებისა და საგამოძიებო სამსახური.
ჯანდაცვის პოლიტიკის სპეციალისტის აკაკი ზოიძის განცხადებით, ეს გაკეთდა საერთაშორისო პრაქტიკაზე დაყრდნობით, და რისკ-სარგებლის ანალიზით. ეს ეხება ესენციალური, აუცილებელი სფეროების და სერვისების წარმომადგენლებს. მათთვის შემცირდა ვადა დადასტურებიდან მეექსვე დღეს. ანუ ხუთი დღე სრული. ამის წინაპირობა რა თქმა უნდა არის ის, რომ 24 საათი არ უნდა გქონდეს არანაირი სიმპტომი, მითუმეტეს ტემპერატურა.
