აეროპორტში მომხდარი ინციდენტის საქმეზე ვერდიქტი ცნობილია. „ნაციონალური მოძრაობის“ წევრი გიგი უგულავა სასამართლომ ძიუდოისტ ბადრი გავაშელიშვილის ცემის საქმეზე უდანაშაულოდ ცნო.
მოსამართლე ბადრი კოჭლამაზაშვილის თქმით, მართალია, კონფლიქტის მონაწილეებმა ერთმანეთს დაზიანება მიაყენეს, თუმცა მხარეების მიერ განვითარებული რომელიმე ვერსიის მისამხრობად დამატებით მტკიცებულებები, რომელიც სასამართლოს ერთი ან მეორე მხარის პოზიცია გაზიარების საშუალებას მისცემდა, არ არსებობდა.
გიგი უგულავას შეფასებით, აღნიშნულ საქმეში დამნაშავე და მოძალადე ბადრი გავაშელიშვილია, მაგრამ ამაზე მართლსამჯულება დუმს, რაც არის მთავარი პრობლემა ამ ისტორიაში. მისივე თქმით, ბადრი გავაშელიშვილი აუცილებლად დაისჯება და ეს საქმე დამთავრდება მაშინ, როდესაც გავაშელიშვილი საჯაროდ იტყვის ვინ დაავალა, ან რამდენი გადაუხადეს.
