საქართველოს სუვერენული საკრედიტო რეიტინგი “BB” დონეზე, პერსპექტივა კი “სტაბილური” დარჩა. საერთაშორისო სარეიტინგო კომპანია “S&P”-ის მიერ მიღებული გადაწყვეტილების შესახებ ინფორმაციას ეკონომიკის სამინისტრო ავრცელებს.
ანგარიში საქართველოს ეკონომიკაზე კორონავირუსის ნეგატიური გავლენების გათვალისწინებით გამოქვეყნდა.
“საერთაშორისო სარეიტინგო კომპანიამ განიხილა და უცვლელად დატოვა საქართველოს სუვერენული საკრედიტო რეიტინგი BB და, რაც ყველაზე მნიშვნელოვანია, უცვლელად დატოვა პერსპექტივა სტაბილური. ეს იმის ინდიკატორია, რომ საქართველოს ეკონომიკა მიუხედავად გლობალური გამოწვევისა და რეგიონში არსებული რთული ვითარებისა, ინვესტორებისთვის კეთილსაიმედოა;
ეს არის ინდიკატორი ინვესტორებისთვის, რომ მათ შეუძლია გააგრძელონ საინვესტიციო პროექტები, ან ახალი განახორციელონ; ეს არის ინდიკატორი, რომ ჩვენ ძალიან დაბალი და მართვადი რისკები გვაქვს და საქართველოს ეკონომიკა გადახდისუნარიანია,”-განაცხადა ეკონომიკის მინისტრმა ნათია თურნავამ.
