სემეკი „თელასსა“ და „თელმიკოში“ მონიტორინგს იწყებს. სემეკის თავმჯდომარის დავით ნარმანიას განცხადებით, სამუშაო ჯგუფი დილიდან იმყოფება „თელასში“.
მისი თქმით, მონიტორინგი იქნება გასვლითი, შეისწავლიან მრიცხველებიდან მონაცემების აღების სისწორეს, შემდეგ უკვე დარიცხვის კანონიერებას, თუ რამდენად სწორად არის დარიცხვები გაკეთებული, როგორ იგზავნება ქვითრები, ხომ არ არის რაიმე სახის ჩვენ მიერ დადგენილ წესებთან შეუსაბამობა და მომხმარებელთა ინფორმირებასთან დაკავშირებულ საკითხებს შეისწავლიან, ასევე ნახავენ მონაცემთა ბაზას, სადაც ფორმირდება დარიცხვები, მოხმარებული ენერგიის შესახებ ინფორმაცია და საიდანაც ხდება შემდეგ უკვე ქვითრების გაგზავნა.
ნარმანიას განცხადებით, არსებითი დარღვევების შემთხვევაში, მარეგულირებელი კომისია გაორმაგებულ ჯარიმებს გამოიყენებს, სხვა შემთხვევაში ეს შეიძლება იყოს სიტყვიერი გაფრთხილება.
კომისიის გადაწყვეტილებით, აღნიშნული პროცესი ერთი თვე გაგრძელდება. მათივე ინფორმაციით, 3 მარტს დასრულდება შემოწმება და წარედგინება კომისიას.
