სანზონაში, ექიმ-თერაპევტის სახლიდან დიდი ოდენობით გახრწნილი ხორცის ამოღების საქმეზე გამოძიება სისხლით, ან სისხლის კომპონენტებით უკანონო ვაჭრობის მუხლით დაიწყო.
18 ივნისს, სანზონაში, ექიმ-თერაპევტის კუთვნილი საცხოვრებელი კორპუსის ბინიდან, მეზობლების ინფორმაციით, სამართალდამცავებმა დიდი რაოდენობით გაფუჭებული ხორცი ამოიღეს. ბინის მეპატრონე მოქმედი მედიკოსია, ის ამ დრომდე საქმიანობას მუხიანში მდებარე ერთ-ერთ კლინიკაში განაგრძობს.
მედიკოსის სახლიდან ამოღებულ ხორცს ექსპერტიზა უტარდება. თავად ექიმ-თერაპევტი სამართალდამცავებმა ორი დღის წინ გამოკითხეს. როგორც მისი ოჯახის წევრი აცხადებს, ქალის მიერ საგამოძიებო ორგანოსთვის მიწოდებული ინფორმაციის მიხედვით, მას საცხოვრებელ ბინაში მაცივარი და კანალიზაცია ჰქონდა გაფუჭებული, სადარბაზოში არსებული მძაფრი სუნი კი სწორედ აღნიშნულ ფაქტს უკავშირდებოდა.
