თბილისის მერის კახა კალაძის განცხადებით, ნუცუბიძე-ვაშლიჯვრის გზასთან არსებულ ფერდობზე მეწყრული პროცესების გააქტიურების შესახებ მერიას ინფორმაცია თავიდანვე ჰქონდა, რის გამოც უსაფრთხოების მიზნით, დროულად ჩაიკეტა გზა მაჭავარიანის ქუჩაზე.
მერის განმარტებით, ადგილზე უცხოელ ექსპერტებთან ერთად პროექტირების სამუშაოები მიმდინარეობს და კონკრეტული ღონისძიებები კვირის ბოლოდან დაიწყება.
,,გერმანელი ინჟინერ-გეოლოგები გვთავაზობენ, რომ მონიტორინგთან ერთად განხორციელდეს გამაგრებითი და სადრენაჟო სამუშაოები, რაც კვირის ბოლოს დაკონკრეტდება. სიტუაციას ვაკონტროლებთ, მოსახლეობას პანიკის საფუძველი არ აქვს“, – აღნიშნა თბილისის მერმა.
კახა კალაძის განცხადებით, მეწყრული პროცესების მიმდებარე ტერიტორიაზე კორპუსების მშენებლობის სამუშაოები არ განხორციელებულა და არც მომავალშია დაგეგმილი.
