“ქართული ოცნების“ დეპუტატი სოზარ სუბარი აცხადებს, რომ საქართველოს ევროკავშირში ინტეგრაციის შესახებ რეზოლუციის პროექტი დიდი ხანია მომზადებულია, ამ დრომდე მასზე მუშაობა მიმდინარეობდა და ახლა არის ვითარება, როცა პროცესის დაჩქარებულად ლობირება შეიძლება.
მისი თქმით, დანარჩენ დეტალებზე მუშაობა გაგრძელდება, მთავარი სამუშაოა ევროპელ პარტნიორებთან, რადგან ევროკავშირში ინტეგრაცია ცალმხრივად არ ხდება
„ევროპული არჩევანი და ევროპასთან ყოფნა ქართველი ხალხის მრავალსაუკოვანი არჩევანია. ეს არ არის რომელიმე ეპოქის ან პოლიტიკური გუნდის განწყობა. ევროკავშირში გაწევრიანება არის უახლოესი დროის მთავარი ამოცანა. ეს ჩაწერია საქართველოს კონსტიტუციაშიც, რომელსაც სხვათა შორის, არც ერთმა ოპოზიციურმა ძალამ მხარი არ დაუჭირა. თუ დოკუმენტის შინაარსა და სულისკვეთებაზე ვთანხმდებით, დანარჩენ დეტალებზე მუშაობა გაგრძელდება. მთავარი სამუშაოა ევროპელ პარტნიორებთან, რადგან ევროკავშირში ინტეგრაცია ცალმხრივად არ ხდება. ჩვენი სურვილი არ არის საკმარისი, თუ არ იქნება ევროკავშირში შემავალი ქვეყნების თანხმობა“, – განაცხადა სოზარ სუბარმა.
პარლამენტის ევროპასთან ინტეგრაციის კომიტეტმა საქართველოს ევროკავშირში ინტეგრაციის შესახებ რეზოლუციის პროექტი მოამზადა. 13 პუნქტისგან შემდგარ პროექტში გამოხატულია ევროკავშირის წევრი ქვეყნებისა და ევროკავშირის ინსტიტუტებისადმი პარლამენტის მოწოდება, გადადგან ყველა საჭირო ნაბიჯი საქართველოს ევროკავშირში გაწევრიანების დასაჩქარებლად. პროექტის ინიცირების პროცედურა დაწყებულია.
