საქსტატმა დღეს 2021 წლის 9 თვის პირდაპირი უცხოური ინვესტიციების (FDI) სტატისტიკა გამოაქვეყნა. დოკუმენტის მიხედვით, წლის პირველ სამ კვარტალში საქართველოში $728.4 მილიონის ინვესტიციები შემოვიდა, რაც წინა წელთან შედარებით 3.2%-ით მეტია.
FDI-ს შორის $613 მილიონი არა ახალ ინვესტიციებზე, არამედ “რეინვესტიციებზე” მოდიოდა. შესაბამისად, წელს რეინვესტიციების წილი მთლიან ინვესტიციებში 84% იყო. ასეთივე მაღალი იყო რეინვესტიციები 2020 წელსაც და ის ინვესტიციების ნაკადის 80%-ზე მეტს შეადგენდა.
წელს ინვესტიციების მხრივ პირველ ადგილზე გაერთიანებული სამეფოა, საიდანაც $271.1 მილიონი შემოვიდა. თუმცა, საქართველოს სამი უმსხვილესი კერძო საფინანსო ჰოლდინგი “თიბისი” “საქართველოს ბანკი” და “საქართველოს კაპიტალი” სწორედ ბრიტანეთში არის რეგისტრირებული და მაღალი ალბათობით, ბრიტანული FDI-ს ნაწილი სწორედ მათ აქტივობებს ასახავს.
მეორე ადგილზეა ნიდერლანდები, საიდანაც $106.4 მილიონი შემოვიდა. მესამე ადგილზეა ჩეხეთი, საიდანაც FDI-ს სახით $81 მილიონი შემოვიდა. $75.6 მილიონით მეოთხე პოზიციას თურქეთი იკავებს. რუსეთი კი $53.3 მილიონით მეხუთე ადგილზეა.
