გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა, საქართველოში გაეროს განვითარების პროგრამის ხელმძღვანელთან, ლუიზა ვინტონთან ერთად, თეთრიწყაროს მუნიციპალიტეტის სოფელ ასურეთში მდებარე ენდემური და ადგილობრივი ხორბლის ჯიშების სადემონსტრაციო-სანერგე მეურნეობა დაათვალიერა და იშვიათი ქართული ხორბლის ჯიშების – დიკასა და შავფხას მოსავლის აღების პროცესს დაესწრო. ნინო თანდილაშვილმა ხორბლის ჯიშთა აღდგენის, შენარჩუნებისა და გამრავლების მიმართულებით სახელმწიფოს პოლიტიკაზე ისაუბრა.
„ქართული ენდემური ხორბლის ჯიშების აღდგენისა და წარმოების ხელშეწყობა სამინისტროს სტრატეგიის ნაწილს წარმოადგენს. ჩვენ სელექციის და ახალი ჯიშების წარმოების უზარმაზარი პოტენციალი გვაქვს“, – განაცხადა მინისტრის მოადგილემ.
„მნიშვნელოვანია, ისეთი ენდემური და ადგილობრივი ჯიშების აღდგენა, რომელიც კლიმატის ცვლილების მიმართ მედეგია და გამორჩეულია გემოვნური თვისებებით“, – განაცხადა ლუიზა ვინტონმა.
ელენე დათეშიძე
