„დროას“ წევრები და სამოქალაქო აქტივისტები აჭარის ავტონომიური რესპუბლიკის თავმჯდომარის, თორნიკე რიჟვაძის გადადგომას ითხოვენ. „ქართული ოცნების“ ოფისთან გამართულ აქციაზე ნუგზარ ფუტკარაძეზე შესაძლო ზეწოლისა და მოსყიდვის მცდელობის საქმის გამოძიებას და მისი გარდაცვალების მიზეზების გამოკვლევას ითხოვენ.
აქციის ორგანიზატორები პროტესტის შეწყვეტას არ აპირებენ, მათი თქმით, ხელისუფლებამ უნდა იცოდეს, რომ მათ არ ეშინიათ და აღარავინ დარჩება მარტო მოძალადე სისტემის წინაშე.
„ერთიანი ნაციონალური მოძრაობის“ ბათუმის ორგანიზაციამ აუდიოჩანაწერი გამოაქვეყნა. მათი თქმით, ჩანაწერში ასახულია თუ როგორ ცდილობენ მმართველ პოლიტიკურ პარტიასთან დაკავშირებული პირები ენმ-ის წევრის, ნუგზარ ფუტკარაძის მოსყიდვას და ახორციელებენ მასზე ზეწოლას.
ნუგზარ ფუტკარაძე ბათუმის ახალი საკრებულოს წევრი იყო ენმ-დან და 18 ნოემბერს გარდაიცვალა. მისი გარდაცვალებამდე ოპოზიციას ბათუმის საკრებულოში უმრავლესობა ჰქონდა.
თავად აჭარის მთავრობის თავმჯდომარე, თორნიკე რიჟვაძე ამბობს, რომ ჩანაწერებში მისი ოჯახის წევრი არ ფიგურირებს და ბოდიშის მოხდას ითხოვს.
