პარლამენტის თავმჯდომარის შალვა პაპუაშვილის განცხადებით, ევროკავშირში წევრობაზე განაცხადი უკრაინამ და მოლდოვამაც შეიტანა, თუმცა ყველა ობიექტური შეფასებით საქართველო ასოცირების დღის წესრიგის და შეთანხმების შესრულების კუთხით ამ სამეულში ლიდერი გახლავთ და თავისთავად არის მოლოდინი, რომ ამ შეცვლილი კონტექსტიდან გამომდინარე, ევროკავშირი დაჩქარებული პროცედურით იმსჯელებს.
“ქართული ოცნების” წინასაარჩევნო პროგრამის ნაწილი იყო 2024 წელს ევროკავშირში წევრობაზე განაცხადის გაკეთება, რასაც ოპონენტები ირონიულად უყურებდნენ სულ რამდენიმე დღის წინაც კი, რომ ასეთი გეგმა და პრეტენზია ჰქონდა “ქართულ ოცნებას” ეს განაცხადი გაეკეთებინა. დღეს ვხედავთ, რომ მცდელობა არის ზოგიერთი ჯგუფის მხრიდან, რომ თავის თავზე მიიწეროს ეს ინიციატივა. ამას მნიშვნელობა არ აქვს. მთავარია, რომ ეს არის საქართველოს განაცხადი ევროკავშირში წევრობაზე და სიმბოლურია, რომ ისევე, როგორც ასოცირების შეთანხმებას ამ განაცხადს ხელი მოაწერა ირაკლი ღარიბაშვილმა. მაშინ, როგორც პრემიერ-მინისტრმა და ახლაც როგორც პრემიერ-მინისტრმა”,- განაცხადა პაპუაშვილმა.
მისი თქმით, მთავარია რომ ჩვენ მივყვეთ ასოცირების შეთანხმებას. მთავარი შედეგი ჩვენი მოსახლეობისთვის არის არა იმდენად ფორმალური ნაწილი სტატუსისა, არამედ შინაარსობრივი ნაწილი ევროპულობისა და სწორედ ამას მისდევს “ქართული ოცნების” გუნდი და პარლამენტი. მისი თქმით, პირველი მოსმენით მიიღეს “მომხმარებელთა უფლებების დაცვის შესახებ” კანონი, რომელიც არის საუკეთესო ევროპული პრაქტიკის გადმოტანის ერთ-ერთი მაგალითი და მათ შორის, ასოცირების შეთანხმების შესრულების ერთ-ერთ მაგალითი.
