თბილისის საკრებულომ თბილისის ბიუჯეტში ცვლილებების შეტანის საკითხი განიხილა. სარეზერვო ფონდში გადამისამართდა თბილისობისთვის გამოყოფილი ნახევარი მილიონი ლარი. ეს თანხა დღესვე გადაირიცხება ბათუმში საცხოვრებელი კორპუსის ჩამონგრევის შედეგად დაზარალებული ოჯახებისთვის შექმნილი ფონდის ანგარიშზე. ამის შესახებ კახა კალაძემ თბილისის მუნიციპალიტეტის მთავრობის სხდომის დაწყებამდე განაცხადა.
გარდა ამისა, სხდომაზე გადაწყდა, რომ თბილისში მცხოვრები ყველაზე მოწყვლადი ჯგუფისთვის – პენსიონერებისთვის, ფინანსური ტვირთის შემსუბუქების მიზნით, მედიკამენტების დაფინანსების პროგრამა განხორციელდება.
კახა კალაძის განცხადებით, შესაბამისი პროგრამის ფარგლებში პენსიონერები 500-ლარიან ვაუჩერებს მიიღებენ. „დაფინანსება ვაუჩერული პრინციპით მოხდება და წელიწადში მისი ღირებულება 500 ლარი იქნება. პენსიონერს საშუალება ექნება, ოჯახის ექიმის მიერ დანიშნული სხვადასხვა მედიკამენტი თბილისის მერიის სპეციალური, 500-ლარიანი ვაუჩერის ფარგლებში შეიძინოს“, – განაცხადა კალაძემ.
პროგრამის ბიუჯეტი 10 მილიონი ლარი იქნება.
