ხელვაჩაურში არქეოლოგებმა მეექვსე სამარხი აღმოაჩინეს, რომელშიც 29 ადამიანის ნეშტი იყო. ბათუმისა და ლაზეთის ეპარქიის ინფორმაციით, აღნიშნული ნეშტები 1937-38 წლებში სტალინის პერიოდის დროს რეპრესირებულ ადამიანებს ეკუთვნის. მათივე ინფორმაციით, არქეოლოგიურ სამუშაოებში პოლონელი სპეციალისტები იყვნენ ჩართული, რომლებიც თავად ეპარქიამ მოიწვია.
“სამხედრო ბაზის ტერიტორიაზე მეექვსე სამარხია, რაც ჩვენი სამუშაოების შედეგად აღმოვაჩინეთ. 2016 წელს მეუფე დიმიტრის ლოცვა -კურთხევით ეს საქმე დავიწყეთ. მანამდე აღმოჩენილ სამარხებიდან 120 ადამიანის ნეშტი ამოვასვენეთ. ამ მეექვსე სამარხში 29 ადამიანის ნეშტია აღმოჩენილი. ნეშტებთან ერთად ვიპოვეთ მონეტები და დახვრეტილთა პირადი ნივთები. ნეშტები1937-38 წლებში სტალინური პერიოდის დროს რეპრესირებულ ადამიანებს ეკუთვნის”, – განაცხადეს ბათუმის და ლაზეთის ეპარქიაში.
