24 იანვარს ხორვატიის პრეზიდენტმა განაცხადა, რომ უკრაინას ნატოში არაფერი ესაქმება. მისი თქმით, უკრაინა დღესაც ერთ-ერთ ყველაზე კორუმპირებულ ქვეყნად რჩება და თუ რუსეთი უკრაინის წინააღმდეგ აგრესიას განახორციელებს, ის ხორვატ ჯარისკაცებს აღმოსავლეთ ევროპიდან გაიყვანს.
ამ განცხადების შემდეგ უკრაინის საგარეო საქმეთა სამინისტროში ხორვატიის ელჩი დაიბარეს. კიევში ამბობენ, რომ მილანოვიჩის განცხადება რუსული პროპაგანდის გამეორებაა და ის ხორვატიის ოფიციალურ და თანმიმდევრულ პოზიციას არ შეესაბამება, რომელიც უკრაინის სუვერენიტეტს და ტერიტორიულ მთლიანობას მხარს უჭერს.
ხორვატიის პრემიერ-მინისტრმა ანდრეი პლენკოვიჩმა ქვეყნის პრეზიდენტის, ზორან მილანოვოჩის სკანდალური განცხადების შემდეგ უკრაინელებს ბოდიში მოუხადა.
„იმის გათვალისწინებით, რომ უკრაინაში ჩვენი ჯარი არ იმყოფება, ხოლო პოლონეთში მყოფი კონტინგენტი სამშობლოში უკვე დაბრუნდა, მე არ ვიცი, თუ რა ჯარისკაცების გაყვანას აპირებს პრეზიდენტი, მისი განცხადება უკრაინაში არსებული კორუფციის შესახებ ჩვენი პოზიცია არ არის და ასეთი უცნაური განცხადებებისთვის მე მთავრობის სახელით უკრაინელებს ბოდიშს ვუხდი“, – განაცხადა ხორვატიის პრემიერ-მინისტრმა.
